Biasso Sanitouso

Biasso sanitouso – soun istòri, si benfa e soun manja

L’impourtanço baiado au voucabulàri prouvençau d’un fru, d’un liéume vo d’un coundimen adus la provo de soun estacamen à nosto terro. La cousino es touto uno istòri partènt d’aquéli fru, liéume vo ounchuro, en mai quand es prouvençalo aganto uno autro sabour apetissènto. N’en farai pas un plat, coume lou Jan-Toupin, veirés li receto vous baion envejo de cousineja. E pèr aquéli qu’acampo fam, tout acò crido : “manjo-me !”

Vai ! Lou libre es bèn alenga… pas soulamen pèr tasta la bono biaisso, mai tambèn pèr la parladuro, lou lengage di cousiniero… Tout lou voucabulàri prouvençau perboulis aqui, dins lou tian o la cassolo.

Vous pode auboura un pau lou curbecèu e ramenta que d’ùni d’aquélis istòri e raconte, souto la plumo d’Ugueto, troubèron plaço, fai de tèms, dins lou mesadié Prouvènço d’aro, d’ùni legèire n’an degu garda souvenènço, mai, bèen segur, l’oubrage recampo tambèn forço inedit, que soun aqui culi coume de pebre.

Adouc, prenés, aro, lengo pèr tasta aquelo bono cousino prouvençalo e n’encapa lou bon lengage prouvençau, lou parla dóu bres d’Ugueto nascudo à Maiano.

Tricìo Dupuy, Direitouro dis Edicioun Prouvènço d’aro.